PAI

Pois si. Escribo estas tres letras un 19 de marzo de 2015. Pai. Pai só hai un. O pai é o principio. A alfa. A lúa. O mar. O vento. A montaña. O río. O ceo. O sol. A sombra protectora do carballo centenario. A memoria imperecedoira. O piar. A torre románica que sostén o noso pequeno universo vital. O pai fala e as súas palabras póusanse engordiñas sobre nós, coa frescura e anchura da verdade. Pai heroe. A persoa máis sabia do mundo (aínda que no saiba ler nin escribir). O pai. A forza. A loita. A maxia (é quen de adiantar a primavera por un sorriso na nosa faciana). Pai artista. Tallando con infinda paciencia a forma, o sentido, o significado do amor. O pai. O que está sempre ao noso carón. Aberto as 24 horas do día, desde a alba ata o amañecer, incondicionalmente, sen pedir nada a cambio. O pai. Tres letras marabillosas, únicas, irrepetibles. Por iso este artigo imprescindible. O Pai. Un día cres que marchou para non volver, pero estás equivocada, non é así. Un pai non marcha nunca xamais. O pai é a luz que nos ilumina na estrada cada día ao longo e ancho da nosa vida.