A forza do amor

A vida é un doce repenique. O noso ben máis prezado. Un papaventos de mil cores distintas voando por entre as nubes do ceo de Compostela. Pero abonda un retrinco para que rache o nobelo e se desfaga o feitizo. Téñoo dito nalgunha outra ocasión, o máis difícil da Vida é vivila. Non hai consolo posible. O Día grande de Galicia ficará impreso para sempre no noso corazón. Algo de todos Nós quedou para sempre nese tren. O sufrimento, a dor de todo un pobo. Pero tamén ficará impreso, a solidariedade, a bondade, a humanidade de todo ese pobo. A forza de toda a xente que colaborou in situ ou desde as súas casas ou desde calquera recuncho do universo. A forza necesaria para seguir vivindo. A forza do amor.