Coral Endesa As Pontes

Unha vez tomada a decisión, os membros da Agrupación puxéronse mans á obra rapidamente e pasados apenas un par de meses da súa fundación, fixeron a súa presentación oficial. Con valentía e decisión subíronse ó escenario e amosáronlle ós seus veciños os froitos desas primeiras semanas de actividade. Como premio recibiron o agarimo e o apoio de todos. Tanto de aqueles que se implicaron dende o comezo co proxecto, como dos que descoñecían o proceso de creación, e quedaron abraiados co resultado.

Nas súas orixes a Agrupación estaba composta fundamentalmente por traballadores do complexo mineiro eléctrico da central de Endesa, e aínda a día de hoxe moitos dos seus fundadores permanecen vinculados á Agrupación e continúan traballando para o fomento e a divulgación da música coral e a difusión da nosa cultura.

Dirección

Naquel primeiro concerto, a Agrupación Coral Endesa As Pontes estivo dirixida polo ex mestre de capela don Alfonso de la Torre Piñeiro, que se mantivo á fronte durante moitos anos. Foi o director que máis tempo permaneceu coa Coral, comezando a súa actividade neses primeiros compases do ano 74 a manténdose ata o ano 2001, cando decidiu deixar paso á que sería a nova directora; dona Miriam Fernández Marín.

Despois dela, a coral tivo outros dous nomes propios; don Juan Bautista Bernat Alcaide e Dona Andrea Iglesias Rey, que se sucederon na batuta ata que tomou o relevo a que se encarga hoxe en día do equipo, dona Olga Vigo.  

Repertorio

O repertorio desta coral é un dos máis amplos que se poden atopar, máis de 300 obras conforman o seu listado e nel inclúense as obras máis importantes dos máis destacados compositores universais.

Sen límites xeográficos en canto á elección das obras, o seu repertorio vai dende a polifonía clásica, a sacra, as panxoliñas e as habaneiras, ata a música popular galega e española. Ademais, en moitas ocasións tamén inclúen nos seus concertos grandes obras da música latinoamericana.

Con un espazo reservado para o folklore popular galego, senten especial devoción polas letras dos escritores galegos que reflicten o sentir do noso pobo. E é que o fomento e o enxalzamento da cultura e as tradicións galegas é tamén unha das súas prioridades e un dos seus elementos diferenciais.

Moi apegados ás súas raíces e cun marcado sentimento de orgullo pola terra, Galicia está moi presente en todo o que envolve a esta coral. Sempre sen esquecer a importancia do universal para continuar medrando e enriquecéndose.

Premios

Ademais do gañar o Primeiro Premio de Masas Corais de Foz, tamén recibiron outros galardóns e recoñecementos. Entre eles, foron finalistas do II Certame Rexional de Masas Corais de Lugo, e finalistas tamén na fase Nacional de Masas Corais de Educación e Descanso.

Por outra banda, recibiron o Premio Especial da Polifonía Rexional das edicións trinta e trinta e unha do Certame de Habaneiras e Polifonía de Torrevella nos anos 84 e 85.

E no que respecta as súas actuacións importantes, non se poden deixar de nomear os concertos no salón de actos e nas cárceres militares do Concello de Melilla, e tamén nas de Ceuta, así como na Exposición Universal de Sevilla e no Festival Artístico Musical de Santiago de Compostela con motivo da Semana das Forzas Armadas de 1985.

Outro momento que recordan con gran agarimo, tanto os coralistas como o resto das persoas que puideron disfrutar desta actuación, é o que viviron no ano Santo de 1993 na Catedral de Santiago. Despois de peregrinar ata a capital durante cinco días, cantaron a Misa Solemne dos Peregrinos, unha actuación cargada de sentimento e emotividade, que todos gardan na memoria de xeito especial.

Concertos e viaxes

Atendendo a esa paixón pola música que é a que os move, e tamén nese intento de fomento da cultura e a tradición, a Coral Endesa As Pontes leva as súas costas máis de 400 concertos repartidos por toda a xeografía española e tamén fora das nosas fronteiras. Entre os lugares que podemos destacar nas súas xiras, atópanse todas as Comunidades Autónomas de España, incluíndo as Illas Canarias e Baleares e tamén Ceuta e Melilla.

Fora das nosas fronteiras senten especial devoción por dous países moi vinculados a Galicia, tanto por tradición como por historia; Portugal e Suíza, onde a emigración abriu uns vínculos especiais que este tipo de actividades axudan a coidar e manter.

Tamén tiveron a oportunidade no ano 2012 de visitar a República Checa para participar no Primeiro World Music Festival Praga, compartindo experiencias con grupos de moi diversos países.

Ademais, recentemente realizaron xiras polo Cataluña, Alacante, Valencia, Cádiz, Mallorca, Navarra e Zaragoza.

Contan con catro discos que recompilan o seu traballo. Neles recóllense as súas obras máis representativas e, fieis á súa filosofía, a música popular galega ten unha importante presenza nestes proxectos.

En colaboración co Concello de As Pontes organizan varios festivais ó longo do ano, e tamén forman parte do programa da Rede Cultural da Deputación de A Coruña, así como da Federación de Corais Galega (FECOGA).

Radio e Televisión

Tamén participaron en programas da Radio e a Televisión de Galicia, e mesmo da Radio e Televisión Española.

A súa colaboración con outras corais, e os encontros e eventos nos que colaboran, dan boa mostra tamén do carácter humilde e traballador desta Agrupación, sempre disposta a colaborar naquelas actividades que fomenten o intercambio musical e cultural entre as distintas comunidades e rexións.