Tamara Pérez, subida aos escenarios dende a adolescencia

A que te dedicas profesionalmente?

Eu son cantante, levo dende os 15 anos cantando con diferentes orquestras como Tango de Vigo, a Monumental de Ourense, actualmente a orquestra Delirio… e compaxinándoo cos meus estudos e outros traballos musicais, compoño música e tamén participo con outras formacións.

Como comezaches no mundo da música?

Pois dende pequena foi a miña paixón e tiven a sorte de que a familia sempre me apoiou. Un día coñecín a unha persoa que precisaba unha cantante para a súa orquestra, fíxome unha proba e entrei na súa orquestra.

Que supuxo para ti estar en Recantos?

Iso foi a bomba. Foi a mellor experiencia a nivel profesional que tiven, tanto polo trato recibido pola xente de Luar como por coñecer a numerosos artistas, axudoume a medrar como persoa e como profesional.

Que actuación foi a que máis che marcou?

Todas teñen o seu punto especial pero, quedaríame coa última porque sentinme satisfeita do resultado, aínda que sempre se pode mellorar. De todas aprendín e con todas medrei.

Como era o ambiente na túa sala Recantos?

Fabuloso. Levabámonos todos de marabilla, incluso fixemos o amigo invisible por Nadal… eramos rivais pero grandes amigos; a día de hoxe aínda conservo amizades daquela época.

Que estudaches?

Estou acabando unhas asignaturas de bachiller que tiña pendentes. Eu quería ser cantante e só me dedicaba a música pero co tempo deime conta que fai falta algo máis e retomei os estudos, nun futuro quixera facer educación infantil, xa que me gustan moito os nenos e ensinar é un arte.

Como transmitirías o teu gusto pola canción a outras persoas?

Gustaríame ensinarlle a parte bonita da música, evidentemente tamén ten cousas malas, pero ensinarlles o que se sinte cando cantas, cando tocas un instrumento, esa ledicia e felicidade cando fas o que realmente che gusta.

Que comentan os teus amigos da túa profesión como cantante?

Ninguén se sorprendeu porque os que me coñecían de toda a vida sabían da miña paixón pola música dende pequena. Cando estudaba na ESO e os meus compañeiros vian que xa estaba comezando a dar os primeiro pasos nas orquestras pois sorprendíanse, curioseaban. Trátase dun ámbito que sempre chama a atención. Tiven o seu apoio, os meus amigos incondicionais sempre estiveron aí apoiándome.

Como decidiches presentarte a Recantos?

Non o tiña en mente pero xurdiu, ese ano quería deixar as orquestras e como non tiña nada que perder decidín probar.

Saíu algún proxecto de colaboración tras a túa participación en Luar?

Hai unhas semanas cantei no Luar un tema de Rafaella Carra con Carolina López (Recanteira da Coruña). O certo é que foi unha experiencia marabillosa.

Tes algún tema na rede que poidan escoitar os lectores?

Si, en decembro de 2012 a miña parella e máis eu dedicamos unha canción a Luar, titulada “Tatuados no tempo” que a compuxemos con moito agarimo con motivo do 20 aniversario do programa. Recentemente compuxemos un tema para o Festival da Canción do Grove, no que quedamos segundos. Estamos traballando e compoñendo máis cousiñas, pero ata agora é o que temos inédito.

No festival do Grove erades os únicos de fóra das Rías Baixas?

Pois si, entereime de casualidade entrando nunha rede social, informeime, anoteime o 17 de setembro e o prazo finalizaba o 30 de setembro. Estivemos moi apurados xa que non tiñamos nada en mente, compuxemos unha canción pop-rock con moito traballo e moitas ganas e finalmente fomos alá e quedamos segundos, a pesares de ser ourensáns e os 18 participantes restantes todos eran das Rías Baixas.

Que lle recomendarías á xente que quere ser emprendedora?

Diríalles que o máis importante é ser constante porque todas as portas están pechadas e hai que tratar de abrilas, e se continúan pechadas non pasa nada, hai que continuar traballando, poñendo empeño, aprender dos erros, non perder a ilusión nin as ganas que é o máis importante.