Información de Interese Vilagarcía de Arousa

Teléfonos de interese:

Festas:

Santa Rita ten lugar o 22 de maio (festivo local) goza de gran devoción entre os vilagarciáns e os veciños de todo O Salnés, que recorren á “avogada dos imposibles” para que lles axude a resolve-los seus problemas.

San Roque. Son as festas patronais de Vilagarcía e celébranse durante 10 días en torno ó 16 de agosto, festividade de San Roque. A primeira xornada é de carácter relixioso onde miles de fieis acompañan ó santo na procesión e na que a imaxe se vai movendo ó son do pasodobre “Triunfo”. A parte lúdica da festa comeza ás 12 do mediodía coa Festa da Auga na que os xóvenes recorren as rúas ó grito de “¡auga!”, sendo regados con toda clase de artificios colaborando ademais os bombeiros que mollan a mangueirazos dende os seus vehículos.

O Combate Naval, clausura os grandes festexos cunha batalla entre un barco e un castelo de luces que se desenvolve na dársena do Peirao de Pasaxeiros. A exhibición complétase cun lanzamento de fogos de artificio e unha demostración de fogos acuáticos.

Xullo é o mes festivo por excelencia na vila mariñeira do Carril. O Carme (16 de xullo), O Apóstolo (25 de xullo) e San Fidel (domingo seguinte ó Apóstolo) son as tres citas principais, ás hai que engadi-la celebración de San Roque (16 de agosto).

Vilaxoán celebra o sábado e domingo seguintes ó 16 de xullo as festas do Carme. Na vertente lúdica, destaca a celebración do festival “Vilaxoán canta”, un certame no que os veciños fan gala das súas dotes para o canto. Tamén salientar as celebracións en honor á Virxe do Rosario o primeiro domingo de outubro.

En agosto a Fundación Ruta Xacobea do Mar de Arousa e Ulla na que se integran 18 concellos organiza unha peregrinación que rememora a translación do corpo do Apóstolo Santiago dende Jaffa (Palestina) ata Iria Flavia. Declarada de interese cultural, esta actividade realízase dende o ano 1965.

A Festa da Ameixa de Carril celébrase na segunda quincena de agosto. Durante unha fin de semana pode degustarse a ameixa nas máis variadas preparacións e acompañada de viño albariño.

Mostra do Alvariño artesanal; coincide cos festexos de San Roque e a ela acoden as bodegas familiares e artesanais productoras de alvariño para dar a coñecer o seu producto. O evento ten lugar na antiga Praza da Pescadería.