Principios de poda (I)

A poda constitúe unha das prácticas con maior efecto sobre a saúde das plantas e das árbores. Cando estas podas se realizan dunha maneira axeitada, non só logramos mellorar a estrutura e con iso o soporte e o balance físico da planta, senón que conquerimos os obxectivos para os que foron plantados.  Así, mediante podas ben realizadas temos fustes rectos para obtención de madeira, copas espaciadas e amplas para ornamentación en parques e xardíns, formas productivas en frutais, etc.

Existen unha serie de principios e técnicas que todo podador debe coñecer para comezar a podar unha planta ou árbore.

• Cada corte que facemos supón unha ferida e un cambio no crecemento, polo que debemos ter claro o propósito do corte antes de facelo.

• Unha poda deficiente pode causar danos que durarán toda a vida da planta ou poden supoñer o inicio dunha praga ou enfermidade. É por tanto importante coñecer as técnicas básicas, as formas axeitadas de facer eses cortes de poda.

• Como norma xeral os cortes pequenos supoñen un dano menor, polo que sempre que poidamos realizaremos as podas nas fases xuvenís das plantas ou árbores e das súas estructuras. É mellor podar pólas novas máis frecuentemente e non esperar a podar en estados adultos cando os cortes e os danos van ser maiores.