Coa dorna en ombros, as peñas chegan a Riveira

Case unha semana antes do día grande, o 24 de xullo, comezará unha celebración que ten como protagonista indiscutible á dorna, a embarcación típica da Ría de Arousa. Ademais da regata de dornas, o programa conta cun amplo abanico de competicións, actividades e concertos, con opcións para todos os gustos.

“O Viveiro”

Dende a organización da Festa da Dorna decidiuse poñer en marcha este ano un campamento para que os máis pequenos vivan de xeito positivo esta festa. “Queremos que o primeiro contacto dos mozos coa Festa da Dorna non sexa a través do alcohol, senón cos xogos que fixeron grande a celebración”, así o explicaba o vicepresidente da Confraría da Dorna, Narciso Fernández.

Polo tanto, durante este mes de xullo, rapaces de entre 7 e 11 anos participarán nos campamentos coñecidos como “O Viveiro” e poderán disfrutar das actividades que se levan a cabo en dito evento (canción da tasca, carrilanas…).

Grazas a unha rifa

Todo comezou cun sorteo organizado pola Comandancia da Mariña de Vilagarcía no ano 1948. Con motivo da festividade local da Virxe do Carme, patroa dos mariñeiros, o afortunado que tivera no seu haber a rifa premiada recibiría una embarcación de tipo dorna. Moitos veciños, tanto de Ribeira coma doutras localidades, mercaron as rifas, e varios deles resultaron premiados.

O 24 de xullo dese ano, os gañadores convocaron na praia do peirao portuario a todos aqueles que quixeran estar presentes na botadura da dorna Virxe do Carme, e unha vez rematado o acto, disfrutaron dun baile organizado nun bar do Concello.

Un ano despois volveuse a convocar ó pobo para celebrar o primeiro aniversario deste acto. Ó baile sumáronse outras actividades que amenizaron a festividade, actividades que perduran ata os nosos días.

Posteriormente, os premiados por ditas rifas pasaron a formar parte da “Real e Ilustre Confraría da Dorna”, tendo como obxectivo principal a organización e celebración do aniversario da Dorna, que foi adquirindo sona nas localidades veciñas.

Sen embargo, non todo foi sempre de cor de rosas e, co paso dos anos, a festa sufriu dificultades económicas. Así foi como naceron as “peñas”: Cajaboi Island, Pedra Pateira, Cabuxos do Mar, Berberechos Asasinos, Parrochiñas da Ria, As Fanecas Bravas e os Sinco Fodonsiños, Kirie Eleixon, Os Petóns, As Nasas, Chopitos and Tramallos Corporeixon, Os Lorchos. Once peñas, 40 persoas e un soño feito realidade.

O espírito da Dorna

Non se sabe con exactitude se foi no ano 1996 ou no 1997 cando se escribiu o himno dorneiro, pero foi no 1998 cando se fixo público na contraportada do programa desta festividade.

O autor é Santi Páramo e a música e interpretación correu a cargo de Ancoradoiro e os Diplomáticos de Monte Alto, que gravaron o himno no derradeiro CD que editaron. É a última canción, aínda que non figura no listado.

Sete días cargados de actividades

O programa da LXVI edición da Festa de Dorna ven cargado de actividades, que comezarán o próximo 18 de xullo e rematarán coa esperada “Rejata de Embarcasións Feitas á Machada e Propulsión a Pan de Millo. Jran Premio Cutre Sark”. Así como o oen.

Dende numerosos concursos, ata xogos, romarías, bailes, actuacións… sempre acompañados de entretidos grupos musicais (gaitas, charangas, orquestras, etc.).

Disfrutaremos do concerto de Os Diplomáticos de Monte Alto e das actuacións de Cè Pantasma, Carricobanda, Bodega-Bodega, Guezos, A Rebanda, La Banda de Andrelo, Kilomberos, Fanfarria Taquicardia, A Banda de Balbina, La Vieja Yegua Gris, Doc Shock, Acústica, The Lakazans e Ollomol.

“Rejata de Embarcasións Feitas á Machada e Propulsión a Pan de Millo. Jran Premio Cutre Sark”

O prato forte desta festa consiste nunha regata na que os participantes constrúen o seu propio buque, e deben trasladalo dende a “zona de fondeo” ata o “campo de regatas” paseándoo nos ombros da peña por todas as rúas de Ribeira. Nesta fazaña están acompañados de bandas de gaitas e charangas, que animan o paeíño.

A regata desenrolarase na praia de Coroso, comezando na beira e finalizando nunhas boias que servirán de meta. Sen embargo, o importante non é ser o máis veloz, senón amosar orixinalidade, deseño e construción.

Ao remate desta proba, terá lugar a entrega de premios na Avenida del Malecón, onde haberá unha feira rianxeira e poderanse degustar xoubas e mexillóns.

“Sertamen Itinerante da Cansión de Tasca”

Outro dos atractivos da festa é o concurso de canto, no que as peñas recorrerán tascas, bares e cafeterías. Cada taberneiro dará unha puntuación a estas pezas musicais e, en base a isto, haberá catro finalistas. O día 23, os escollidos repetirán os seus cantos, e será un xurado formado polos representantes das demais peñas participantes, o que designará ó gañador.

“Juateke Dorneiro”

Grazas á colaboración económica dos hostaleiros da localidade poderanse celebrar varios miniguateques ó longo das xornadas festivas. Para isto instalarase unha carpa nunha das prazas, onde se recreará o ambiente propio dos anos 60 e 70.

“Jran Prix de Carrilanas”

A única condición para participar no “Jran Prix” é dispoñer dunha carrilana na que os eixes e rodas sexan de madeira. Al peñas terán que tirar de enxeño para construílas, e con elas descenderán unha pendente de máis dun quilómetro, a coñecida como “Alto da Mámoa”, para desembocar preto da praza do Concello.

Os participantes volverán a amosar aquí a súa capacidade creativa, realizando un vehículo sobre rodas no que imperará, igual que na regata, a creatividade, crítica irónica, tecnoloxía e ganas de participar.

“Exame de Patróns”

Unha acertada pregunta ou unha proba superada será o motivo polo que unha nova peña pasará a formar parte da Asamblea de Peñas Dorneiras, e disfrutará de todos os privilexios que isto leva consigo.

Realizarase diante do resto das peñas na praza do Concello, e contará coa singularidade de que para realizar o exame ponse coma condición indispensable ofrecer un suborno ó tribunal para que valore a proba con obxectividade.

“Romaría Dorneira”

E como tada festa galega que se prece, haberá que acordarse tamén do estómago, non? As sardiñas asadas e as empanadas serán as protagonistas na Romaría Dorneira, na que ademais haberá grupos de gaitas, charangas musicais e distintos xogos e pasatempos. Entre outros, o campionato mundial de chinchimonei, as carreiras de sacos, o lanzamento de disco, os titiriteiros, os monicreques… Todos os que o desexen poderán disfrutar de balde dunha marabillosa xornada nas inmediacións do merendeiro situado a carón da Praia de Coroso.Será o broche de ouro a unha semana de festa e celebración por todo o alto.