A Xunta aproba o programa de manexo e rotación das explotacións porcinas extensivas de Porco Celta de Galicia

A Consellería do Medio Rural aprobou o Programa común de manexo e rotación a aplicar para o ano 2022 nas explotacións porcinas extensivas de Porco Celta de Galicia. Con isto preténdese acadar o correcto desenvolvemento deste particular sistema produtivo, impulsando a un tempo o aproveitamento ordenado dos recursos naturais do medio rural galego.

O Decreto polo que se desenvolven as normas básicas de ordenación das explotacións porcinas extensivas e se crea o Rexistro Galego de Explotacións Porcinas Extensivas na Comunidade Autónoma de Galicia describe as condicións necesarias para garantir o correcto desenvolvemento deste sistema produtivo. Así, establece que as explotacións da raza de Porco Celta poderán propor un programa de manexo e rotación común, desenvolvido pola entidade xestora do libro xenealóxico e supervisado polos seus servizos técnicos. Este programa de manexo deberá ser aprobado anualmente pola consellaría competente en materia de gandaría.

A Asociación de Criadores de Gando Porcino Celta (Asoporcel), como entidade oficialmente recoñecida para a xestión do libro xenealóxico da raza Porco Celta, presentou unha proposta de Programa de manexo e rotación a aplicar nas explotacións porcinas extensivas de porco celta para o período 2022. Cómpre sinalar que ao citado programa de manexo e rotación só se poderán acoller explotacións nas que se críe en pureza a raza Porco Celta.

O programa de manexo e rotación nas explotacións porcinas extensivas pretende garantir unha axeitada utilización da totalidade do medio físico, o aproveitamento dos recursos naturais da explotación e o establecemento de sistemas de rotación e utilización racional do terreo, evitando fenómenos de sobreexplotación que supoñan a deterioración do ecosistema de soporte.

Explotación sostible do rural galego
Galicia conta entre as súas razas autóctonas co Porco Celta, que grazas á súa rusticidade, está perfectamente adaptada ao manexo en réxime de liberdade nos sistemas de explotación en extensivo.

Este tipo de produción permite o aproveitamento ordenado dos recursos naturais do medio rural galego, axudando ao mantemento e control da biomasa vexetal pero sen esquecer a protección do medio ambiente. Esta forma de produción característica supón un valor engadido que se estende tamén aos produtos obtidos, diferenciándoos e incrementando a súa demanda e prezo.