A Xunta asesora a entidades galegas para optar ás convocatorias europeas de I+D+i dotadas con 600 M€

A directora da Axencia Galega de Innovación, Carmen Cotelo, destacou hoxe a competitividade das entidades galegas nas convocatorias europeas de I+D+i vencelladas os ámbitos de alimentación, bioeconomía, recursos naturais, agricultura e medio ambiente do programa Horizonte Europa de investigación e innovación. Desde 2021, a nosa Comunidade leva captado máis de 30 millóns de euros nesta liña a través de 68 proxectos liderados ou participados por empresas, universidades e centros de coñecemento galegos destes sectores.

Co fin de facilitar que estas entidades poidan presentarse ás convocatorias deste 2025 e optar aos fondos de 600 M€ que se distribuirán en toda a Unión Europea, a Consellería de Educación, Ciencia, Universidades e FP conta cun programa de asesoramento. Nese marco, este xoves tivo lugar un obradoiro de identificación de proxectos inaugurado por Carmen Cotelo.

En concreto, a directora da Axencia Galega de Innovación expuxo as posibilidades para as pequenas e medianas empresas, que poden adherirse ao programa galego de fomento de participación europea, PEMEuropa. Esta iniciativa ofrece, de xeito gratuíto, un diagnóstico sobre a capacidade para participar nestas convocatorias, itinerarios personalizados e acompañamento durante todas as fases de preparación das propostas. Obradoiros coma o celebrado hoxe axudan a identificar posibles ideas e proxectos.

Taxa de éxito por riba de España

As entidades galegas son especialmente competitivas nos ámbitos que aglutina o denominado Clúster 6, é dicir, alimentación, bioeconomía, recursos naturais, agricultura e medio ambiente. De feito, mentres que en Horizonte Europa Galicia logra captar un 3,57% dos fondos estatais totais, no eido concreto destes sectores a taxa aumenta ao 6,6%.

Neste senso, as propostas galegas presentadas ás convocatorias deste ámbito teñen tamén unha elevada taxa de éxito, por riba da media de España. Mentres que a taxa de éxito da nosa Comunidade é do 30%, no conxunto do Estado para o conxunto de Horizonte Europa é dun 20,7%.