A Xunta licita por 2,3 M€ o subministro e instalación do equipamento da central de esterilización do hospital Novo Montecelo

A Xunta vén de publicar no Portal de Contratos Públicos de Galicia, por medio da Consellería de Sanidade, a licitación da subministración e instalación do equipamento integral da central de esterilización do Hospital Novo Montecelo da área sanitaria de Pontevedra e O Salnés por un importe de 2.312.273 euros.

As empresas interesadas en participar neste procedemento poderán presentar as súas ofertas ata o vindeiro día 13 de febreiro.

Este contrato responde á necesidade de dar unha correcta cobertura sanitaria á poboación da área de referencia, mellorando os servizos de atención sanitaria coa adquisición do equipamento integral dunha nova central de esterilización que preste servizo tanto ao bloque cirúrxico como ao resto de unidades asistenciais.

Esta nova central emprázase na planta -1 do Hospital Novo Montecelo. Para o seu dimensionamento realizouse un estudo dos datos actuais de actividade do hospital e a súa previsión de crecemento no medio e longo prazo.

A nova central deberá ter unha capacidade operativa que permita procesar todo o instrumental, equipamento e accesorios cirúrxicos. Ademais, deberá dispoñer de capacidade adicional para procesar o resto de material xerado nas áreas intervencionistas, críticos, consultas e gabinetes, urxencias e similares.

Así mesmo, deberá dispoñer do maior grao de informatización do servizo e capacidade de integrarse no sistema informático de xestión integral dos procesos desenvolvidos polo Servizo de Esterilización dispoñible no resto de hospitais da área sanitaria.

Estruturación

No que atinxe ao seu funcionamento, a nova central estará estruturada en tres ámbitos destinados ás actividades de descontaminación e lavado, de inspección e montaxe de sets, de esterilización e almacenamento dos dispositivos xa esterilizados, separados polas correspondentes barreiras sanitarias de lavado automatizado e esterilización. Adicionalmente dispoñerá dunha zona de despacho, estar e aseos de persoal

Dentro de cada un dos ámbitos citados, deberá garantirse polas características do equipamento, a adecuada independencia entre as actividades de lavado manual e carga de lavadoras, as de inspección, montaxe de sets e carga de esterilizadores para o segundo e as de descarga de esterilizadores e almacenamento de material esterilizado para o terceiro, impedindo en todo momento o contacto do material sucio co xa esterilizado.

O equipamento debe contemplar a máxima automatización dos procesos e das tarefas de carga e descarga, a máxima ergonomía e confort global das condicións de traballo, niveis adecuados de insonoridade e un tempo de procesamento óptimo.

Os equipos fomentarán o coidado do medio ambiente, tanto no referente á eficiencia enerxética -incluíndo equipamento que reduza os consumos de auga e enerxía eléctrica, sen diminuír por iso a súa eficacia de funcionamento e produtividade-, como ao consumo de funxibles e produtos químicos e a xeración de residuos.

As características do equipamento ofertado, así como as posibilidades para a súa disposición física, terán a finalidade de alcanzar os maiores niveis de funcionalidade, eficiencia e seguridade, tanto no que se refire ao propio desenvolvemento dos procesos, como no que se refire ao uso adecuado e á capacidade de produción dos equipos.