Cociñeiros de toda España que suman 80 Estrellas Michelín participarán en xuño no evento gastronómico Estrelas no Camiño

Presentación de “Estrelas no Camiño”

O director de Turismo de Galicia, Xosé Merelles, participou hoxe na presentación da décima edición do evento gastronómico solidario Estrelas no Camiño de Santiago, que se celebrará no mes de xuño co apoio da Xunta de Galicia e a participación de preto de 40 cociñeiros de distintos puntos de España que suman máis de 80 Estrellas Michelín.

Xosé Merelles salientou o bo momento que atravesa este evento que, “ano a ano está a ser quen de aumentar o número de participantes e consolidarse como unha cita imprescindible para a gastronomía galega”, explicou. Como dixo, trátase dun proxecto especialmente importante para o turismo galego xa que aglutina varios dos elementos que definen parte do seu éxito.

Neste sentido, salientou que a gastronomía, segunda motivación para elixir Galicia como destino, está a ser unha liña de traballo prioritaria nos últimos anos como demostra, por exemplo, a posta en marcha do Plan Territorial de Sustentabilidade Turística Enogastronomía de Galicia, ao abeiro do que se están a desenvolver distintas estratexias en destino en 80 concellos galegos e se están a levar a cabo liñas de axuda e accións de cohesión para impulsar estes recursos.

Estrelas no Camiño de Santiago tamén pon protagonismo noutro dos elementos fundamentais do modelo turístico galego como a ruta xacobea que, como engadiu o director de Turismo, está a recuperar a súa internacionalización xa que no que vai de ano o número de peregrinos estranxeiros que recolleron a Compostela supón o 58%. Ademais, de xeito global, o número de camiñantes está a aumentar a un ritmo do 21%.

Beneficios a Síndrome X Fráxil

A edición deste ano de Estrelas no Camiño de Santiago reunirá a varios dos mellores chefs de España que se unirán para homenaxear a excelencia da gastronomía galega. Nesta décima edición, os beneficios irán destinados por segunda vez á Asociación Galega Síndrome X Fráxil e como cada ano, está previsto percorrer un tramo do camiño de Santiago, levar aos chefs ao Mercado de Abastos e visitar o Monte do Gozo.

Os cociñeiros que participarán este ano na inciativa son Martín Berasategui, Marcos Granda, Jordi Cruz, Enejo Atxa, Jesús Sánchez, Ángel León, Helena Arzak, Hermanos Torres, Paolo Casagrande, Joan Roca, Toño Pérez ou David Muñoz. Tamén participarán Paco Roncero, Pablo González, Nacho Manzano, Pepe Vieira, Javier Olleros, Fran Martínez, Rui Paula, Ramón Freixa, Paulo Airaudo, Ivan Cerdeño, Diego Guerrero, Manuel Costiña ou Marcelo Tejedor. Completan a listaxe Lucía Freitas, Miguel González, Óscar Vidal, Pepe Solla, Begoña Rodrigo, Hugo Muñoz, Juan Carlos Caro, Arnaldo Azevedo, Iñaki Aldrey, Valeiro Carrera, David de Jorge, Igor Zalakain.

O evento gastronómico solidario será na Finca Casa Barqueiro en Gonte, Negreira, o luns 10 de xuño, onde se presentarán novidades en produtos gastronómicos e enolóxicos na feira que os asistentes poderán gozar dun menú tipo cóctel e de estacións gastronómicas con showcooking nunha tarde de música e animación. As persoas interesadas en acudir poden adquirir as súas entradas e obter información en www.estrelasnocamino.es.