Últimos días para solicitar praza nas escolas infantís da Xunta de Galicia

As familias interesadas en solicitar praza nas escolas infantís da Xunta teñen de prazo para facelo ata mañá, mércores día 5 de abril. O Goberno galego oferta 10.500 prazas de 0 a 3 anos na súa rede de centros públicos autonómicos para o vindeiro curso 2023-2024.

As peticións de praza cursaranse, preferentemente, por vía telemática a través da sede electrónica da Administración autonómica, aínda que opcionalmente poderanse presentar de maneira presencial por rexistro. Unha vez que se avalíen as solicitudes e se resolvan as alegacións, o listado definitivo de admitidos sairá publicado o 31 de maio e o período de formalización da matricula para os nenos que resulten admitidos será do 1 ao 14 de xuño.