As axudas para apoiar o aforro e a eficiencia enerxética nas empresas galegas poderán solicitarse a partir de maio

Francisco Conde nas instalacións de Grúas Norte

O vicepresidente primeiro e conselleiro de Economía, Industria e Innovación, Francisco Conde, visitou esta mañá en Santiago de Compostela as instalacións da empresa familiar Grúas Norte, vinculada á instalación e reparación de aeroxeradores. No encontro informou da próxima apertura -no mes de maio- do prazo de solicitudes para acceder ás axudas destinadas ao aforro e eficiencia enerxética das empresas galegas.

Tal e como se aprobou a semana pasada en Consello, estará dotada con 7,5M€ e ofrecerá apoios de entre o 35 e o 55%, segundo o tamaño da beneficiaria. Preténdese acompañar ás empresas no proceso de transición enerxética de cara a conseguir un tecido empresarial máis sustentable.

Conde destacou a aposta de Grúas Norte pola modernización e innovación da compañía e incidiu nas oportunidades de negocio que a transición enerxética abre ao tecido empresarial. Neste sentido, lembrou que Galicia defenderá, a través da nova Lei de promoción dos beneficios sociais e económicos dos proxectos que utilizan os recursos naturais de Galicia, que esta transición se realice desde un aproveitamento planificado dos recursos naturais, sendo garantista desde o punto de vista ambiental e cun impacto positivo na sociedade e a industria.