publicidade hoxe

Rueda eloxia a pegada da emigración na Arxentina e en Galicia e reedita o compromiso e o apoio da Xunta coas entidades do exterior

PUBLICADO EN: Noticias de GaliciaGaliciaGalicia exteriorPortada esquerda
A-
A+
O presidente galego no acto do 170 aniversario do Club Español

O presidente galego no acto do 170 aniversario do Club Español

O presidente da Xunta, Alfonso Rueda, eloxiou a pegada da emigración na Arxentina e en Galicia e reeditou o compromiso e o apoio da Xunta coas entidades do exterior.

Na súa primeira visita ao país suramericano como titular do Goberno galego, Rueda interveu en Buenos Aires no acto de celebración do 170 aniversario do Club Español e do 15 aniversario de Ospaña perante un auditorio formado por unhas 200 persoas, maioritariamente representantes da colectividade galega, socios do Club Español, persoal de Ospaña e outros invitados vencellados coas dúas entidades. No acto gabou o labor da emigración galega na Arxentina e da emigración arxentina en Galicia: “A historia con minúscula de miles de emigrantes fraguou a nosa Historia con maiúscula”, indicou.

Alfonso Rueda destacou o labor de sociedades como Club Español polo seu compromiso perante tres séculos cos cidadáns españois en Arxentina, e particularmente, cos galegos que emigraron ao país suramericano, e agradeceu tamén o compromiso dunha entidade como Ospaña que leva 15 anos entregada a paliar as necesidades sanitarias e sociais dos seus afiliados. Indicou que, con ese percorrido, non podía ser froito da casualidade, senón resultado dunha traxectoria altruísta, o feito de que hoxe en día ámbalas dúas entidades estean presididas por galegos: Benito López Carballedo no caso do Club Español e José Luis Seoane no caso de Ospaña.

O presidente da Xunta compartiu velada coa comunidade galega na Arxentina nun acto celebrado na sede do Club Español en Buenos Aires. No encontro, salientou a beleza do impoñente edificio como símbolo da súa historia e como berce do desenvolvemento dos galegos que perante décadas chegaron a Arxentina na procura dun futuro para eles e para as súas familias, o que deu lugar a unha “galeguidade que carece de fronteiras” subliñou.

O presidente da Xunta agradeceulles o seu labor e manifestoulles que Galicia “nunca poderá saldar a débeda que ten cos seus fillos no exterior”, pero que, con ese compromiso, mantén nas súas prioridades as iniciativas desenvolvidas para favorecer o retorno con axudas ao emprendemento e á formación dos retornados e dos fillos e netos dos galegos no exterior.

Visita ás instalacións de Ospaña

Na súa primeira xornada na Arxentina, o presidente da Xunta visitou tamén as instalacións de Ospaña en Buenos Aires. A sede social da entidade está situada nun edificio que foi inaugurado no ano 2019 por Alberto Núñez Feijóo e que vén de mellorar os recursos e os servizos que presta aos seus 80.000 socios.

Ospaña naceu hai 15 anos para prestar atención sanitaria aos seus afiliados, independentemente da súa idade e da súa situación económica.

14 de outubro de 2022 | 13:25 • Sen comentarios

Comentarios pechados.