O nomeamento da nova delegada da Xunta en Montevideo renova o compromiso de Galicia coa atención á diáspora

Toma de posesión da nova delegada da Xunta no Uruguai, Elvira Domínguez

O presidente da Xunta, Alfonso Rueda, destacou hoxe, durante o acto de toma de posesión da nova delegada da Xunta no Uruguai, Elvira Domínguez, que este nomeamento renova o compromiso de Galicia coa atención á diáspora, co fomento da nosa cultura e co impulso ás relacións económicas.

“Galicia e O Uruguai temos moitas oportunidades”, enfatizou Rueda, quen por iso salientou a importancia de que a nosa Comunidade estivera representada de xeito permanente. “O camiño é modernizar as relacións entre dúas terras que teñen tanto que ver”, apuntou.

A este respecto, aseverou que Galicia segue disposta a apostar polo Uruguai para espallar alí todo o noso potencial empresarial e ten as portas abertas para que os uruguaios que así o desexen fagan a súa vida na Comunidade. Así, o titular do Executivo galego garantiu por parte da Xunta a “atención” dos que queren seguir a continuar vivindo no país de acollida, como de todos aqueles galegos e galegas emigrados a América que “queiran retornar”. Unha atención e “coidado” que tamén estendeu á xente moza, da que salientou que está volvendo á nosa terra para formarse a través de másters, grazas á incentivación da Administración autonómica.

“A Xunta está convencida de que reforzar a súa presenza en América vai en beneficio de todos os galegos”, valorou. Precisamente, a Xunta seguirá achegando axuda de emerxencia social e individual aos galegos de alá que peor o están a pasar, velarase pola continuidade das entidades e manterase a colaboración cos 100 centros promotores do Camiño. Ademais, para os que queiran exercer o seu dereito ao retorno, está activa a pioneira Estratexia Retorna (2,7 M€) que segue sendo unha folla de ruta imprescindible con bolsas de formación Beme para estudar un ciclo de FP ou un másters en Galicia, axudas para emprender ou apoio social para facilitar a integración social.

O presidente da Xunta salientou que Elvira Domínguez cumpre cos requisitos que se esixen para este tipo de responsabilidades “que sexa respectada no seu país e conte con sentimentos de galeguidade potentes”. A traxectoria da nova delegada da Xunta neste país destaca por ter sido a primeira presidenta da Asociación de Empresarios Gallegos no Uruguai en 2017, na que se puxo como obxectivo reforzar as pontes que conectan ambos territorios.