publicidade hoxe

A Xunta oferta 110 prazas de comedor e 74 de residencia nos catro centros de formación e experimentación agraria de Galicia

PUBLICADO EN: Noticias de GaliciaGaliciaPortada esquerda
A-
A+

O Diario Oficial de Galicia (DOG) publica hoxe a orde da Axencia Galega da Calidade Alimentaria (Agacal), organismo dependente da Consellería do Medio Rural, pola cal se anuncian as bases reguladoras do procedemento de adxudicación de prazas de residencia e de comedor nos centros de formación e experimentación agraria (CFEA) para o curso académico 2021/2022.

Deste xeito, ofértanse un total 110 prazas de comedor repartidas de tal modo que corresponderían 28 ao CFEA Lourizán, 25 ao CFEA Sergude, 22 ao CFEA Pedro Murias e 35 ao CFEA Becerreá. Tamén se ofertan outras 74 prazas en réxime de pensión completa para os CFEA de Lourizán e Sergude, correspondéndolles 32 e 52 prazas a cada un respectivamente.

O prazo de presentación de solicitudes será dende mañá, día seguinte de publicación da orde no DOG, ata o 30 de xullo. As persoas interesadas deberán reunir unha serie de requisitos tales como: ser cidadáns da Unión Europea ou estranxeiros con permiso de residencia ou que se atopen dentro dun programa de cooperación internacional, estar matriculados no centro solicitado durante o curso escolar e acadar a maioría de idade durante o ano 2021 no caso das prazas en pensión completa do CFEA de Lourizán ou ter 16 anos para a convocatoria do CFEA de Sergurde.

Para poder acceder a estas prazas, tanto as de comedor como as de residencia, os interesados deberán solicitalas preferiblemente por vía electrónica a través do formulario dispoñible na sede electrónica da Xunta ou, opcionalmente, presentando a solicitude presencialmente en calquera dos lugares e rexistros establecidos na normativa reguladora do procedemento administrativo común.

No caso das persoas que durante o curso académico anterior tivesen praza de residencia, estes conservarana para o curso seguinte da formación na que estivesen inscritos, sempre e cando acrediten o cumprimento dos requisitos académicos para o curso e non sexan repetidores do mesmo.

Os centros de formación e experimentación agraria adscritos á Agacal pretenden ofrecer un servizo complementario ao desenvolvemento educativo da poboación rural por medio das residencias de estudantes de cada un dos centros, co fin de facilitar a asistencia ás clases dos ciclos de formación profesional agraria de grao medio e superior que se imparten nos mesmos.

19 de xullo de 2021 | 09:34 • Sen comentarios

Comentarios pechados.