publicidade hoxe

O contrato para executar as obras de mellora do sistema de depuración de augas residuais de Praceres recibe un total de 9 ofertas empresariais

PUBLICADO EN: Noticias de GaliciaLocal PortadaPontevedraPortada dereita
A-
A+

O contrato para executar as obras de mellora do proceso de depuración da estación depuradora de augas residuais de Praceres, en Pontevedra, cun orzamento superior aos 16,5 millóns de euros, recibe un total de 9 ofertas empresariais.

O contrato prevé un prazo de 3 meses para a redacción do proxecto e de 12 para a súa execución, ademais doutros 12 para a posta en marcha dos novos tratamentos.

O saneamento da ría de Pontevedra é unha das grandes prioridades actuais do Goberno galego en materia hidráulica, onde resulta imprescindible actuar para garantir tanto a recuperación ambiental das augas, a produtividade marisqueira e a actividade turística.

Esta actuación está cofinanciada pola Unión Europea a través do Fondo Europeo de Desenvolvemento Rexional (Feder) nun 80 %, no marco do programa operativo Feder Galicia 2014-2020.

Esta reforma tecnolóxica permitirá mellorar substancialmente a curto prazo a depuración das augas residuais dos concellos de Marín, Poio, Pontevedra e Vilaboa, co obxectivo de cumprir os límites de vertido marcados pola Directiva 91/271/CEE.

A intervención contempla a remodelación do tratamento secundario existente, co fin de garantir a correcta depuración de ata 900 l/s de auga residual. A solución proxectada consistirá na modificación do reactor biolóxico existente para dispoñer dun tratamento de leito móbil e unha posterior clarificación das augas mediante un proceso físico-químico con lastrado por microarea.

Adicionalmente, ampliarase a liña de fango para ter en conta as novas achegas e realizaranse unha serie de actuacións previas para manter o funcionamento da depuradora durante as obras.

Os traballos poden subdividirse en 5 categorías: as actuacións previas, a conversión dos reactores biolóxicos a leito móbil, a implantación dunha etapa de clarificación das augas depuradas, a reforma do edificio de control, e a da liña de tratamento de fangos secundarios.

Esta actuación completarase coa construción dun novo emisario submarino, cuxa execución se prevé iniciar tamén este ano, dando cumprimento aos compromisos adquiridos coa UE.

A reforma da depuradora e a construción do novo emisario submarino forman parte do Plan de saneamento local elaborado tras un exhaustivo análise do actual sistema que foi dialogado cos concellos e os mariscadores da ría.

Ese plan inclúe a necesidade de acometer outras actuacións, entre elas a mellora das redes de saneamento municipais polas que se producen infiltracións indebidas.

16 de maio de 2019 | 15:20 • Sen comentarios

Comentarios pechados.