Preto de 11.000 persoas están convocadas ás oposicións do Sergas que se celebran en Silleda os 9 e 10 de marzo

O Diario Oficial de Galicia (DOG) publica, na súa edición de hoxe, o lugar e a data de realización dos exercicios da fase de oposición do proceso selectivo convocado por Resolución do 1 de marzo de 2018 para o ingreso na categoría de celador. En total resultaron admitidos 10.892 aspirantes, dos cales 218 participan pola quenda de discapacidade intelectual.

É o primeiro proceso selectivo no que se habilitou unha quenda diferenciada de acceso para as persoas con discapacidade intelectual, coas pertinentes adaptacións de temarios e tempo de realización das probas que permiten a concorrencia destes aspirantes en condicións de igualdade ao emprego público, facilitando así a súa integración laboral. Estes aspirantes están convocados o 9 de marzo, ás 10 horas, para a realización do primeiro exercicio da parte específica. O 10 de marzo, ás 15:30 horas examinaranse os aspirantes das quendas de acceso libre, promoción interna e discapacidade xeral, que realizarán os tres exercicios que comprenden a fase de oposición.

Ofértanse neste proceso un total de 390 prazas, das cales 144 corresponden á quenda de acceso libre, 195 á quenda de promoción interna, 21 á quenda de discapacidade xeral e 30 á quenda de discapacidade intelectual.

As probas selectivas realizaranse no recinto da Feira Internacional de Galicia, en Silleda (Pontevedra). Na páxina web do Servizo Galego de Saúde recóllese a información das distintas portas de acceso ao recinto e a relación de aspirantes comprendidos en cada unha delas.

Como en anteriores procesos selectivos, para dar cumprimento ás esixencias de obxectividade e imparcialidade na selección dos/das aspirantes, reforzáronse as medidas de seguridade coa posta a disposición dos tribunais de selección dunha plataforma securizada para a elaboración de cada un dos exercicios da fase de oposición que garante a trazabilidade de todo o proceso e permite a selección aleatoria e automatizada das preguntas de exame.

Coordinación procesos selectivos no ámbito do Sistema Nacional de Saúde

Está previsto que as probas selectivas para o grupo auxiliar da función administrativa se realicen o 7 de abril, e o 12 de maio as correspondentes á categoría de enfermeiro/a. O Servizo Galego de Saúde cumprirá así cos compromisos de coordinación dos procesos selectivos entre as Comunidades Autónomas, adquiridos no ámbito da Comisión de Recursos Humanos do Sistema Nacional de Saúde.