Ábrese unha consulta pública previa para recoller suxestións para a nova Lei do xogo

A Xunta vén de abrir unha consulta pública previa co obxectivo de recoller suxestións de cara á elaboración da nova Lei do Xogo de Galicia, que virá a substituír á anterior normativa, que data de 1985. A consulta, que se pode consultar no Portal de Transparencia, estará aberta ata o próximo 19 de maio.

O sector do xogo vén sufrindo numerosos cambios nos últimos anos, que superan a concepción tradicional desta actividade, con novos produtos, novas tecnoloxías e cunha maior xeneralización e implantación en todos os ámbitos da sociedade.

Coa finalidade de dar resposta a eses cambios, fóronse producindo modificacións na Lei de 1985, así como tamén se aprobaron novos regulamentos en cada sector do xogo, como por exemplo, no caso das máquinas recreativas e de azar, bingo, apostas, ou de casinos de xogos.

Agora, considérase necesario elaborar un novo marco xurídico que se adapte aos actuais usos sociais e ás necesidades de sector co fin de dotar á actividade dunha maior seguridade xurídica. Ademais, a nova lei permitirá unha uniformidade na regulación en materia de xogo, o que facilitará a súa comprensión e aplicación.

Os principais obxectivos deste texto pasarán por facilitar a unidade de mercado para mellorar a competitividade do sector do xogo en Galicia, simplificar a tramitación administrativa e procurar unha maior concienciación do que se entende como xogo responsable.

Entre as súas finalidades, destacan moi especialmente a de afondar nos distintos aspectos da publicidade dentro do ámbito competencial da comunidade autónoma; mellorar os controis de acceso ás salas de xogo; e modificar o réxime sancionador tendo como obxectivo a protección dos menores e das persoas con condutas aditivas. Isto é, trátase de favorecer un maior control no desenvolvemento desta actividade que permita a protección dos usuarios e consumidores.