A Xornada LIDERA “Avanzando en Igualdade” abordará distintos relatorios para pór en relevo a importancia do liderado das mulleres

Rolda de prensa de Susana López Abella

A secretaria xeral da Igualdade, Susana López Abella presentou esta mañá en rolda de prensa o acto institucional da Xunta no Día Internacional da Muller, que un ano máis, leva a cabo a Xornada LIDERA Muller e Liderado “Avanzando en Igualdade”, que terá lugar este mércores 7 de marzo no auditorio do edificio CINC da Cidade da Cultura e se desenvolverá dende as 9 horas ata as 13 horas

A Xunta considera fundamental desenvolver iniciativas orientadas a pór de relevo a importancia do liderado e o empoderamento das mulleres. O foro que aborda a temática ‘Muller e Liderado”, contará con distintos perfís, especialmente mulleres directivas, mulleres emprendedoras, mulleres do eido académico, e con persoas expertas na materia que constitúen exemplos de boas prácticas no ámbito da promoción da igualdade.

Polo que o obxectivo que pretende esta xornada é crear un encontro con distintos espazos de aprendizaxe e intercambio nos que se poida analizar o liderado feminino e dar resposta as necesidades derivadas das condicións específicas do mercado actual respecto do autoliderado e do liderado de equipos, que promova novos referentes e inspire novas prácticas neste eido, contribuíndo ao empoderamento e mellora do desenvolvemento persoal e profesional das mulleres así como das entidades, tanto públicas como privadas.