Sergas e Asanog asinan un acordo para facilitar apoio psicosocial a nenos con tratamento oncolóxico

Sinatura do acordo entre Sergas e Asanog

O conselleiro de Sanidade Jesús Vázquez Almuiña e o presidente da Asociación de axuda aos nenos oncolóxicos de Galicia (Asanog) Gonzalo Autran Castel, asinaron esta mañá un acordo de colaboración para o desenvolvemento dos proxectos integrados no programa “Meu Ben” no ámbito dos departamentos de onco-hematoloxía pediátrica dos centros públicos do Servizo Galego de Saúde.

O programa “Meu Ben” é unha iniciativa de Asanog que ten coma obxectivo prioritario que ningún neno, nin a súa familia, teña que afrontar un tratamento oncolóxico sen o mellor apoio psicosocial posible. Os destinatarios deste programa serán os nenos e a xuventude con idades comprendidas entre os 3 e os 18 anos, con enfermidades oncolóxicas, hospitalizados nos servizos de pediatría.