Balseiro invita a sumar os areais da Mariña á campaña ‘Praias sen fume’

O delegado territorial da Xunta, José Manuel Balseiro, invitou aos concellos da Mariña a sumar areais ao programa da Consellería de Sanidade Praias sen fume, de carácter voluntario e orientación educativa.

Balseiro explicou aos representantes municipais dos concellos costeiros que o obxectivo principal do programa é “desnormalizar o consumo de tabaco na sociedade; cambiar a percepción social sobre o tabaco e que os mozos e mozas vexan que o normal é non fumar”.

A campaña non ten fins recadatorios xa que, así como a adhesión dos concellos é voluntaria, tamén é voluntario o seu cumprimento para os usuarios das praias, polo que non haberá vixilancia.

En todo caso, o areal terá sinalización -con material que facilita a Dirección Xeral de Saúde Pública- informando de que se trata dunha “praia sen fume”. Ademais, a Consellería e outras entidades darán publicidade ás praias adheridas e incluiranse nos folletos turísticos da comunidade.

A participación na Rede de praias sen fume enmárcase en tres niveis: Son membros da rede os concellos que teñen declarada cando menos unha praia; alcanzan a categoría de prata os que teñen declaradas sen fume máis do 50% das súas praias; e a categoría de ouro os que teñen todas declaradas.