Uns 10.800 alumnos formáronse este curso nos oito programas do Plan Proxecta impulsados por Medio Ambiente

Ao redor de 10.800 alumnos, procedentes de 193 centros galegos, formáronse ao longo deste curso nalgún dos oitos programas do Plan Proxecta impulsados pola Consellería de Medio Ambiente e Ordenación do Territorio.

Así o salientou hoxe a titular deste departamento autonómico, Beatriz Mato, durante a súa visita ao posto que a Consellería ten instalado na Feira internacional da Semana Verde de Silleda.

A conselleira considerou “fundamental” que o labor de sensibilización e concienciación ecolóxica comece “desde as idades máis temperás”, para conseguir que esta sexa “efectiva e duradeira”.

Por iso, os departamentos de Medio Ambiente e de Cultura, Educación e Ordenación Universitaria teñen establecido unha “colaboración fluída” para inculcar entre os máis novos os valores de respecto ao contorno e á paisaxe.

Grazas a esta cooperación, este curso implantouse por primeira vez a asignatura “Paisaxe e sustentabilidade” como materia de libre elección para secundaria e bacharelato. A isto súmanse os oito programas que se desenvolveron no marco do Plan Proxecta, dos que dous foron novos este curso: Protexe os animais, para concienciar sobre a protección dos animais domésticos; e Naturézate, para mellorar o coñecemento sobre o noso medio natural. Ao respecto, Mato indicou que onte mesmo, na Semana Verde, entregáronse os premios os mellores proxectos destes programas: o de Naturézate recaeu no CEIP Cervantes de Lugo; e o de Protexe os animais, no CEIP Emilia Pardo Bazán da Coruña.

Esta aposta por concienciar aos máis novos tamén se está a facer patente no programa de actividades que está a impulsar a Consellería nesta Feira da Semana Verde. En concreto, invitouse a preto de 300 nenos e nenas de distintos centros escolares –incluídos un centro e de educación especial e outro de Cogami- a participar en distintas actividades relacionadas co medio ambiente como Pescaprendo, que achega aos alumnos á pesca sen morte e ao comportamento dos peixes; o tiro con arco, que permite aos nenos e nenas desenvolver unha actividade en contacto coa natureza; e outros obradoiros relacionados cos ecosistemas, o coñecemento das aves, a caza ou a elaboración de cadernos de campo para tomar nota da biodiversidade galega.

Precisamente, a conselleira aproveitou a súa estadía na Feira para visitar aos grupos de alumnos que estaban participando esta mañá nas actividades de Pescaprendo e de tiro con arco.

Rede de parques naturais

Mato precisou que a presenza da Consellería de Medio Ambiente nesta feira ten un dobre obxectivo: por unha banda, contribuír á sensibilización social, especialmente entre os máis novos; e por outro, difundir e poñer en valor o patrimonio natural galego.

Con respecto a este último obxectivo, indicou que no posto do departamento autonómico estase a ofrecer información completa sobre os parques galegos e o patrimonio natural. Así, a conselleira lembrou que a recentemente creada Rede de Parques Naturais de Galicia, na que se inclúen os seis espazos galegos desta categoría, ocupa preto de 50.000 hectáreas. A estes enclaves, hai que sumarlles o Parque Nacional Marítimo-Terrestre das Illas Atlánticas, con 8.500 hectáreas.

“Todos eles constitúen un dos grandes símbolos naturais da nosa comunidade”, subliñou e, por iso, o obxectivo da Xunta é establecer sinerxías para mellorar a conservación e posta en valor destes espazos. Para conseguilo, elaborouse un Plan de xestión desta rede de parques, que conta con 51 medidas. Nesta folla de ruta inclúense actuacións como a aposta pola accesibilidade nos parques; o fomento do emprego entre os colectivos máis vulnerables; actuacións de voluntariado; ou a creación de novos produtos ecoturísticos.