Unha nai e o seu fillo resultan feridos nun accidente de tráfico en Silleda

Un turismo saíuse da vía e impactou contra un muro na estrada N-640, na parroquia silledense de Escuadro. Os dous ocupantes do vehículo, unha nai e o seu fillo, resultaron feridos e foron trasladados polos técnicos de Urxencias Médicas ao Hospital Clínico de Santiago.

Ata o lugar do accidente, sobre as 17,30 horas, desprazouse o helicóptero medicalizado con base na capital de Galicia e un equipo dos bombeiros de O Deza, que liberaron a muller, que estaba atrapada no interior do turismo.

O particular que chamou o 112 para alertar indicou que a señora estaba inconsciente e que o seu acompañante tamén necesitaba asistencia médica.

Os efectivos de emerxencias aclararon que o vehículo impactou contra un muro, rebotou e foi parar de novo ao centro da vía. Foi solicitada tamén a colaboración dos axentes de Tráfico e os membros do GES de A Estrada.