O alcalde de Silleda reúnese coa conselleria de Medio Rural á que expuxo o proxecto do Centro de Desenvolvemento Agrario

O alcalde de Silleda, Manuel Cuiña, reuniuse esta tarde coa conselleira de Medio Rural, Ángeles Vázquez, á que lle expuxo as liñas básicas do proxecto do Centro de Desenvolvemento Agrario.

Cuiña reuníuse en San Caetano coa titular do departamento á que explicou que o proxecto do goberno municipal silledense “un dos máis ambiciosos para esta lexislatura” botou a andar coa elaboración do chamado Mapa Agrario de Silleda, no que se establecerán os tipos de cultivo e rendabilidade –entre outras variables- en cada zona do termo municipal silledense.

O rexedor explicoulle á conselleira que a día de hoxe hai xa anotadas 10 persoas para participar como voluntarios/as no arranque desta iniciativa “coa que queremos poñer en valor a agricultura, buscar alternativas á excesiva dependencia do leite no sector agrogandeiro, e sobre todo crear emprego, dándolle a oportunidade aos nosos veciños e veciñas de vivir da terra”, engade.

Ademais de expoñer as liñas básicas do Centro, que se instalará na antiga Cámara Agraria de Silleda, tamén cun carácter formativo, o alcalde

interesouse ante a titular de Medio Rural sobre o estado dos procesos de concentración parcelaria  que aínda están pendentes no municipio.

“Silleda foi un dos primeiros concellos de Galicia en ter concentracións parcelarias, pero a día de hoxe aínda quedan algúns procesos pendentes, polo que dende o Concello consideramos fundamental que se rematen para un mellor desenvolvemento do noso rural”, explica Cuiña.

O alcalde agradece o trato dispensado pola titular de Medio Rural e agarda que dende o departamento autonómico se poidan retomar as parcelarias e se apoie a realización de iniciativas coma a do Centro de Desenvolvemento Agrario.