Adxudícase a pavimentación e renovación de servizos na rúa Vella de Palmeira

O Concello de Riveira vén de adxudicar unha nova actuación consistente na pavimentación e renovación de servizos na rúa Vella, situada na localidade de Palmeira.

A empresa mellor clasificada no proceso de licitación foi Construcciones Oñial, SL., cunha oferta por importe de 54.997 euros, IVE incluído. O prazo de execución son tres meses. 

A día de hoxe a rúa Vella presenta un trazado irregular, cun pavimento de formigón no que se observan danos de importancia, como socavóns e disgregacións. Polo que se refire aos servizos existentes, parte da vía carece de rede de pluviais (e a que hai ten os imbornales en mal estado), a rede de saneamento é antiga e a de abastecemento de auga presenta defectos nas válvulas. 

Por iso, elaborouse un proxecto técnico que inclúe a renovación da rede de pluviais dispoñendo polo centro da rúa un colector de PVC corrugado de 315 milímetros de diámetro e construíndo arquetas sumidoiro en un caz de formigón prefabricado no centro da calzada. Ademais, nos cruces de colectores situaranse pozos de rexistro e realizaranse acometidas de pluviais das vivendas. A rede de pluviais existente renovarase substituíndo as arquetas sumidoiro por outras novas. 

En canto á rede de saneamento, que terá unha lonxitude de 37 metros, instalarase no cruce desta vía coa rúa do Norte e descorrerá paralela a un pequeno regato existente na zona. Instalarase unha tubaxe de 315 milímetros de diámetro e colocaranse pozos de rexistro.

Polo que respecta á rede de auga potable, cómpre indicar que se realizarán reformas substituíndo válvulas e arquetas existentes e que están en estado deficitario. 

Con respecto á pavimentación, empregaranse materiais semellantes aos das rúas da contorna, utilizando adoquín prefabricado de formigón en cores gris e verde colocados sobre morteiro de cemento.