O único galego participante no Campionato de España de Enganche dun cabalo adestra na FIG

Adestramento de Nistal

A Feira Internacional de Galicia ABANCA acolle dende hoxe os adestramentos do único galego que participará no Campionato de España de Concurso Completo de Enganche na modalidade de Limonera (un cabalo), o cal se celebrará do 25 ao 27 de setembro na localidade segoviana de Villacastín.

O participante neste Campionato, Manuel Nistal, levará a cabo estas sesións preparatorias na xornada de hoxe e tamén durante as dúas seguintes  fins de semana, e farao no ring verde do recinto.

Este lalinense xa empregara o pasado ano este espazo para adestrarse de cara a esta competición por reunir o ring condicións moi similares á pista na que se disputará o Campionato de España de Enganches, e volve a facelo agora para a edición de 2015. En 2014 estes adestramentos tamén se desenvolveran no mes de setembro, sendo daquela o Campionato na vila sevillana de Dos Hermanas do 3 ao 5 de outubro. 

Nas sesións de preparación que levará a cabo estes días Nistal o obxectivo é avaliar tanto o seu propio estado como cocheiro como o do cabalo co que vai a competir, a través da execución de reprisse de doma. 

Esta edición do Campionato, que ademais da modalidade dun cabalo ou Limonera acolle outras dúas, de dous e catro cabalos, é a sétima na que participa Nistal. El é ata a data e dende que comezou a competición o único cocheiro galego que acude a este Campionato de España. 

Estes adestramentos son novamente un reflexo da versatilidade coa que conta o recinto para acoller todo tipo de actividades e eventos.