O Trofeo das Festas do Cristo de Balonmán queda na casa

Entrega de trofeo

Enmarcado nas actividades deportivas do programa de festas do municipio, onte celebrábase no Polideportivo Municipal de Porriño, ás 20.30 h, o encontro correspondente ao Trofeo Festas do Cristo 2015. Contou coa presenza do tenente de alcalde, Manuel Carreira, que unha vez finalizado o encontro, fixo entrega dos trofeos en nome do Concello do Porriño.

O Balonmán Porriño non puido contar con seis das súas xogadoras habituais por lesión –Sandra Costas, Nuria Martínez, Gemma Martínez, Sheila Campos, Carla Rivas e Nekane Terés-, non obstante o equipo porriñés demostrou superioridade na pista, a pesar de que ao comezo do encontro o Colexio de Gaia tomou a dianteira no marcador.

O equipo luso, que actualmente xoga na 3ª División de Honra da liga portuguesa, “mantén unha estreita relación co Club Balonmán Porriño, as xogadoras están practicamente irmandadas xa que son múltiples os encontros disputados. Son mutuas as invitacións a torneos tanto no inverno como no verán, que serven a ambos os equipo como adestramentos de pretemporada”, explicaba o técnico porriñés, Abel Estévez.

O desenvolvemento do partido estivo moi axustado durante o primeiro tempo, chegando a tomar a dianteira o equipo portugués nos primeiros minutos, pero o Balonmán Porriño enseguida tomou as rendas chegando ao descanso con 7 sete goles de vantaxe (18-11).

Ao comezo da segunda parte, as xogadoras locais impuxeron a súa superioridade na pista manténdose sempre por diante do Colexio de Gaia, para chegar ao final do encontro cun resultado de 31-26.

Abel Estévez aproveitou este encontro para ofrecer tempo de xogo  a todo o equipo, “xogaron todas 30 minutos repartidos, pensando no derbi do próximo fin de semana”, explicaba o técnico deportivo; e é que este sábado A Sangriña acolle o encontro entre o Balonmán Porriño e o seu eterno rival, o Atlético Guardés.