Brais Misa proclámase campión absoluto do III Dúatlon Festa do Cristo 2015

Máis de 150 corredores percorreron esta tarde as rúas de Porriño, nunha intensa xornada deportiva na que o numeroso  público asistente, gozou animando aos participantes ao longo dos 27,5 km de percorrido que contemplaba o circuíto do III Dúatlon Festas do Cristo. Ás 16.00 h daba comezo o III Dúatlon Infantil, que contou coas categorías benxamín, na que só subía ao pódium Uxía Rodríguez en feminina e en masculina, clasificábanse en primeiro lugar,  Sergio Soto; segundo, Carlos Bautista e terceiro, Xian Martínez.

En categoría alevín feminina a primeira foi a porriñesa Carla Guisande, segunda Laura Alonso e terceira Catalina Pereira; en masculino Alexandre Álvarez foi o primeiro, seguido de Nicolás Maroi e terceiro, Gonzalo Galego.

Na categoría infantil, os que se subiron todo o máis alto do pódium foron Laura Mazoi e David Alan Cristopher Fletcher .

Ás 17.00 h, apiñábanse na meta os 133 corredores que se dispuñan a percorrer os primeiros 5 km en dúas voltas a pé, para continuar en bicicleta os 20 km repartidos en catro voltas e, unha vez chegados novamente á transición –situada en cálea Piñeiral-  deixaban atrás as rodas, para completar o circuíto cunha volta de 2,5 km.

Todo iso baixo unha temperatura de 25 º C e un circuíto cunha lixeira dificultade engadida ás anteriores edicións, ao contemplar maiores desniveis. Non houbo grandes incidencias e só 7 participantes retiráronse xunto a 2 descualificados.

As clasificacións quedaron do seguinte modo:

Absoluto Masculino

1º.- Brais Misa, do Club Atletismo Porriño e un tempo de 00:56:54

2º.- Iago Morenza, con licenza dun día e un tempo de 00:58:05

3º.- César Trasfogueiro, do Infoque Race Team, cun tempo de 00:58:21 e á súa vez primeiro veterano.

O primeiro cadete masculino foi Alejandro Crespo, do AXA Axencia Garriga-Beariz TR

Absoluto Feminino

1º.- María Martínez, do Club Atletismo Porriño e un tempo de 01:07:59

2º.- Aida García, do Olímpico de Vedra e un tempo de 01:08:09, sendo a primeira veterana.

3º.- Iria Rodríguez, do Club Atletismo Porriño e un tempo de 01:10:29, que a converteu tamén na primeira cadete.