publicidade hoxe

O incendio forestal de Cualedro continúa activo tras queimar 2.000 hectáreas

PUBLICADO EN: Noticias de GaliciaCualedro
A-
A+
Europa Press

O incendio forestal que dende este domingo afecta á parroquia de Lucenza, no municipio ourensano de Cualedro, continúa activo e afectou xa a 2.000 hectáreas de terreo, segundo as últimas estimacións da Consellería do Medio Rural. O incendio comezou ás 12,12 horas do domingo e, en pouco tempo, as lapas devoraron decenas de hectáreas, o que obrigou a activar dende as 15,16 horas a alerta denominada ‘situación 2′, que implica perigo para as casas.

De feito, polo menos unha casa non habitada foi arrasada polas lapas e houbo varios desalojos, segundo confirmaron fontes dos corpos de seguridade.

Para controlar este lume, foron desprazados un técnico, 18 axentes forestais, 47 brigadas, 26 motobombas, seis pas, sete helicópteros e nove avións. Tamén acudiron membros da Unidade Militar de Emerxencias (UME).

Concretamente, o Ministerio de Medio enviou un total de nove aeronaves -seis avións anfibios Canadair, de 5.500 litros de capacidade de descarga, procedentes da base de Lavacolla (A Coruña), Matacán (Salamanca) e Torrejón (Madrid) e dous avións de carga en terra, de 3.100 litros, da base de Xinzo de Limia-.

Este dispositivo completouse cun avión de comunicacións da base de Matacán e unha Brigada de Reforzo contra Incendios Forestais (BRIF) de Laza (Ourense).

OUTROS LUMES

Por outra banda, Medio Rural informou de que o lume rexistrado dende o sábado no concello ourensano de Viana do Bolo permanece estabilizado tras queimar unhas 213 hectáreas.

Nos labores de control deste incendio, na parroquia de Pradocabalos, participan un técnico, 11 axentes forestais, 38 brigadas, 15 motobombas, cinco pas, nove helicópteros e seis avións.

Así mesmo, atópase controlado en lume da parroquia de Pexeiros, tamén en Viana do Bolo, que afectou a 70 hectáreas. Na súa extinción traballan 12 axentes forestais, 19 brigadas, 11 motobombas, dúas pas, sete helicópteros e dous avións.

Tamén controlado está o incendio forestal iniciado no Concello de Manzaneda (Ourense), na parroquia de Cernado, que afectou a unha superficie estimada de 250 hectáreas de Rede Natura. Na súa extinción participan dous técnicos, oito axentes forestais, 25 brigadas, nove motobombas, unha pa, catro helicópteros e tres avións.

Finalmente, dende a media noite permanece controlado o lume rexistrado no Concello de Ourense, na parroquia de Cudeiro, no que traballan un técnico, 14 axentes forestais, 30 brigadas, 21 motobombas, dous helicópteros e oito avións. Segundo as estimacións provisionais, afectou a case 55 hectáreas.

31 de agosto de 2015 | 10:20 • Sen comentarios

Comentarios pechados.