Portos de Galicia investirá 170.000 euros na mellora da rede eléctrica das instalacións portuarias de Riveira

Portos de Galicia mellorará a rede eléctrica do porto de Riveira. Os traballos de reforma da instalación eléctrica de distribución en baixa tensión e alumeado público do porto afectarán á práctica totalidade das instalacións do porto e suporán un investimento duns 170.000 euros.

O porto será zonificado en tres áreas para levar a cabo os traballos de modificación e nalgún caso de substitución das acometidas, centros de transformación, cableado e distribución da enerxía, tanto de forza como de alumeado.

A primeira das zonas nas que se levarán a cabo os traballos previstos será a correspondente á nova lonxa de Riveira, club náutico e proximidades exteriores aos dous edificios emprazados no peirao de Riveira. Outra das áreas nas que sucesivamente se van levar a cabo os traballos corresponde á que engloba o peirao comercial e a terceira zona correspóndese coa que coincide cos pantaláns e peirao pesqueiro.

Deste xeito, búscase adecuar as novas instalacións ás futuras necesidades de potencia eléctrica das instalacións portuarias. Os traballos consisten na colocación de elementos de baixa tensión, como canalizacións e colocación de cableado, gavias e elementos de protección. Estas obras forman parte do mantemento que se está a realizar nos portos dependentes do ente público Portos de Galicia.