Comeza a recollida de plásticos agrícolas e de invernadoiros

O departamento municipal de Medio Ambiente de Silleda, que dirixe Luis Rodríguez, inicia mañá mércores a recollida de plásticos agrícolas e de invernadoiros no rural, logo de recibir 36 avisos no período de solicitudes. Para levar a cabo esta actuación, establecéronse 4 áreas xeográficas, avisando previamente aos usuarios.

A primeira das recollidas será mañá na zona norte do municipio, nas parroquias de Cira, Dornelas, Piñeiro, Lamela, Cervaña, Moalde e Chapa.

Os traballos de recollida continuarán a vindeira semana. Así, o mércores 1 de xullo tocaralle o turno a outras dúas zonas. Serán as de Escuadro, Rellas, Margaride, Fiestras, Graba e Xestoso, e á de Abades, Pazos, Carboeiro, Martixe, Saídres, Ansemil, Manduas, Breixa , O Castro, Negreiros, Ponte e Silleda.

As tarefas rematarán o día 2 na zona sur, nas parroquias de Vilar, Taboada, Siador, Cortegada, Oleiros, Laro, Parada e Refoxos.

As comunicacións de recollida realízanse por teléfono indicando o día  e horario aproximados.

 Os agricultores e gandeiros deberán dobrar e empacar os plásticos da mellor maneira posible co fío de empacar ( “rafia plastificada”) que se   comercializa para as pacas.

 Estes plásticos agrícolas almacenados  e  preparados para a súa recollida deberán de ter a menos suciedade posible,  procedente de terra, herba ou materia orgánica e evitar  conter outras materias impropias que poden dificultar os traballos de reciclaxe e tratamento final de recuperación para novos usos.