Porremprego organiza xornadas sobre autoemprego

Co obxectivo de fomentar e crear emprego no noso municipio e nunha nova aposta pola información e o diálogo dos veciños cos diferentes axentes que participan na realidade laboral actual, o Concello do Porriño, a través da concellaría de Emprego e Formación que dirixe M. Alejandro Lorenzo, levará a cabo os próximos  2, 9, 16 e 23 de xuño as Xornadas de Autoemprego 2015.

“Trátase dun programa de conferencias e talleres abertos  á participación do público, no que especialistas en emprendemento e cooperativas achegarán aos participantes as distintas fórmulas e recursos para emprender no mundo do autoemprego”, explica o edil, “estas xornadas están pensadas tanto para persoas desempregadas da Bolsa de Emprego, como aquelas que xa están incorporadas ao mercado laboral, aínda que tamén queremos facer fincapé na participación dos estudantes de cara a ir definindo o seu futuro inmediato”.

A través destas accións, desde Porremprego preténdese romper os mitos sobre a figura do emprendedor, de modo que a través de experiencias persoais e profesionais quede constancia de que calquera persoa con motivación e esforzo, pode levar a cabo un proxecto empresarial e ofrecendo a información e as ferramentas necesarias para poder facer fronte ás diversas dificultades que poden xurdir durante o proceso.

As xornadas desenvolveranse no Multicentro de Torneiros e a entrada será libre e gratuíta.