Continúa no Porriño o “Circuíto Galego de Teatro Amador” cos nenos como protagonistas
Este fin de semana continúa a programación de teatro amateur que o Concello do Porriño, a través da súa concellaría de Cultura, e Atrezo Teatro, trouxo ao noso municipio dentro do Circuíto Galego de Teatro Amador, organizado pola Federación Galega de Teatro Afeccionado.
Se a pasada semana Teatro Escoitade e a compañía Nostrum Cai deleitaron á amantes do arte dramático que se deron cita no Centro Cultural Municipal, este fin de semana será a quenda dos máis pequenos. Así, este sábado a compañía de teatro Fanfarra dos soños , fará as delicias de toda a familia coa posta en escena de “A caixiña dos soños”, un divertido conto infantil no que se mesturan teatro e monicreques, protagonizado por dous viaxeiros que coinciden nunha estación de tren.
Como broche final, o domingo 17 de maio, O Aturuxo de Melpómene subirase ao escenario para representar a súa traxicómica reflexión sobre a crise económica, “Desencaixados. Esperpéntica crise”.
Todas as representacións serán ás 20:30 horas, no salón de actos do Centro Cultural Municipal. Nesta ocasión, o teatro amateur quixo tinguir de solidariedade o seu certame e colaborar cos máis necesitados. Así, o único requisito para poder gozar destas xornadas de teatro, será doar un quilogramo de alimento non perecedoiro en beneficio do Programa Municipal de Alimentos SOS Porriño.