Abre as súas portas o Ecoparque Arbóreo de San Roque

Ecoparque Arbóreo de San Roque

O Concello de Riveira informa de que o Ecoparque Arbóreo de San Roque por fin vai abrir as súas portas. Farao pasado mañá e estará dispoñible para o seu disfrute ata o 19 de agosto, en xornadas gratuítas que terán lugar todos os venres pola tarde e os sábados en sesións matutinas e vespertinas.

Para poder divertirse cos xogos dispostos nesta nova zona de ocio e aventura cómpre ter alomenos seis anos de idade e unha estatura mínima de 1,30 metros. As inscricións terán lugar no propio ecoparque dende media hora antes do comezo da actividade.

O horario de mañá comprende entre as 10.30 horas e as 13.30 horas e o de tarde, de 18 a 21 horas. En cada sesión haberá dous turnos dunha hora e media cada un, sendo un máximo de 16 persoas as que poderán participar en cada un deles (para arrancar a actividade deberá ter como mínimo oito participantes).

Integrado no entorno

Compre lembrar que este novidoso ecoparque situado no perirurbano de San Roque, moi preto do merendeiro, consta de diversos circuítos de aventura integrados no entorno, con todo tipo de xogos como tirolinas, pasarelas, pontes, escaleiras de cordas, pasos de lianas, balanzas colgantes e outros, habendo distintos baremos de dificultade para facer deste parque de aventura apto tanto para os nenos como para adultos.

Na recente apertura da ruta de senderismo circular de Carreira, que partía precisamente do parque, xa puideron disfrutar deles os primeiros afeccionados, estando aberto a partir de mañá a todos os veciños ou visitantes que así o queiran.