Unhas 150 persoas participaron na estrea da nova ruta de sendeirismo circular de Carreira

Participantes na ruta

Arredor de 150 persoas déronse cita esta pasada fin de semana no parque periurbano de San Roque para vivir en primeira persoa a estrea da nova ruta de sendeirismo circular da parroquia de Carreira: o segundo itinerario destas características posto en marcha polo Concello de Riveira despois do que se habilitou en Corrubedo hai ano e medio.

Se ben a maior parte da xente realizou o percorrido de 15 quilómetros a pé (algúns acompañados dos seu cans), houbo quen o quixo facer a cabalo, como por exemplo o concelleiro natural desta parroquia Víctor Reiriz Lampón.

Aplauso a Juan Manuel Tarela

Antes da saída, e tras oportunas explicacións técnicas de Moncho Sampedro, membro da Asociación de Veciños de Carreira que foi un dos responsables do deseño da ruta, houbo un aplauso unánime a Juan Manuel Tarela: o traballador de Amicos que colaborou moi activamente na marcaxe do itinerario e que faleceu recentemente nas pedras de Couso. Precisamente entre os participantes figuraron traballadores desta asociación de persoas con diversidade funcional.

A continuación do emocionante momento de homenaxe, os andaríns transitaron por lugares como a aldea de Castro, O Vilar, o lavadoiro de Vixán, Os Castelos, A Graña, a lagoa de Vixán, Gándara, Casalnovo, Monte da Cidá e Castro da Cidá, regresando de novo ao parque periurbano, onde tiveron ocasión de disfrutar dunha churrascada e de probar os xogos do Ecoparque Arbóreo.