O Concello do Porriño informa da oferta de prazas no programa de balnearios “Coidarte 2015”

Un ano máis, co obxectivo de contribuír ao fomento do envellecemento activo e á mellora da calidade de vida dos maiores, o Concello do Porriño, a través da Concellaría de Benestar Social que dirixe Teresa Veloso, adhírese ao programa diúrno de balnearios Coidarte 2015 da Deputación de Pontevedra. Deste xeito, todas as persoas interesadas en participar nesta campaña xa poden presentar a súa solicitude, con prazo ata o 30 de abril, nos Servizos Sociais do Concello do Porriño (3ª planta), lugar onde tamén poderán informarse máis detalladamente sobre calquera cuestión a este respecto, o impreso de solicitude deberá ir acompañado da fotocopia do DNI.

O programa, dirixido a persoas maiores de 50 anos, pensionistas ou con necesidades de “respiro familiar”, consiste en pasar cinco mañás ou tardes seguidas nun dos balnearios ou talasos da provincia de Pontevedra ofertados a prezos reducidos, xa que o custo total da praza será cofinanciado entre o ente provincial, o Concello e o usuario. Neste caso, a Deputación abonará por cada praza 40 euros, o Concello 10 euros e o usuario unha cantidade variable en función do balneario ou talaso elixido, oscilando entre os 25 e os 67 euros. O prezo inclúe o traslado en autobús desde o lugar de orixe ata o establecemento elixido, dúas horas diarias durante cinco días nas instalacións do talaso, balneario ou spa, gorro e chanclas, refrixerio para despois da actividade, excursión, seguro de viaxe e do establecemento e guía acompañante.

Táboa de prezos

Hotel Vía Argentum, Silleda: 25 €

Talaso Spa Moaña: 45 €

Talaso Atlántico, Oia: 60 €

Balneario de Mondariz: 63 €

Balneario Illa dá Toxa: 66 €

Balneario Termas de Cuntis: 67 €