“Ler conta moito” comeza este xoves na biblioteca Daniel Castelao de Silleda

Pasado mañá xoves día 23, con motivo do Día do Libro, dará comezo na Biblioteca Daniel Castelao de Silleda o programa Ler conta Moito, co obradoiro creativo impartido por Regueifeiros de Galicia. Está dirixido a adultos, mocidade e nenos de 9 a 14 anos.

Trátase dun obradoiro de improvisación oral en verso (regueifa/brindo), dirixida a todas aquelas persoas con inclinación a práctica do verso clásico rimado , e con curiosidade por coñecer as tradicións populares do país, e tamén de fóra del.

O obradoiro comezará ás 17.00 horas.

O programa continuará o vindeiro mes de maio. Así O dia 15, dentro tamén da programación das Letras, a cita será para nenos de 4 a 12 anos, con unha actividade centrada na figura de Xosé Filgueira Valverde, ao que se lle adica este ano o Día das Letras.

Xa no mes de outubro, o día 22, o programa Ler Conta Moito rematará coa actuación de Pablísimo e os seus contos.

O autor traerá a Silleda o espectáculo Rás, Contos Batracios, unha actividade de dinamización adicada a sapos e rás, figuras moi presentes na literatura infantil e xuvenil. Neste caso a actividade diríxese preferentemente a nenos e nenas de 4 a 9 anos.

”O público máis novo será o protagonista desta iniciativa que ten como principal obxectivo o fomento e dinamización da lectura nas bibliotecas públicas, contribuindo á promoción da lectura como vehículo de enriquecemento”, engade o alcalde e concelleiro de Cultura, Manuel Cuiña. O programa foi posto en marcha pola Consellería de Cultura e Educación, a través a Rede de Bibliotecas Públicas de Galicia, en colaboración cos Concellos.