Cobra forma a área de esparcemento na beira do curso baixo do río Arlés

Traballos no parque do Río Arlés

Case un mes despois de que se procedese coa demolición da vella nave leiteira de formigón á beira do curso baixo do río Arlés, operarios da empresa adxudicataria da recuperación integral deste cauce fluvial (Canarga S.L.) están a proceder por fin á creación no emprazamento dunha nova área de esparcemento para disfrute de veciños e visitantes.

Esta área de esparzamento, situada na parroquia de Artes, comprende prazas de aparcamento, un parque biosaudable cunha decena de máquinas aptas exercitar o corpo por de calquera idade, espazos verdes, e un espazo de merendeiro con bancos e mesas de madeira.

Esta acción incardínase no proxecto de recuperación integral do río Arlés e ten por obxectivo crear no seu emprazamento unha nova área de esparzamento para disfrute de veciños e visitantes, que estará situada xustamente no lugar onde arranca a senda paralela ao cauce fluvial, no punto de confluencia coa estrada DP 71304.

A execución de recuperación do río Arlés, Artes ou Sanchanás ten un orzamento de 595.205 euros e forma parte do proxecto Riveira Atlántica 2015, cofinanciado nun 70% con fondos europeos FEDER. A empresa Canarga é a entidade adxudicataria. A empresa Hidria Ciencia, Ambiente y Desarrollo foi a que se encargou de deseñar o proxecto por un importe de 66.182 euros.