Campaña de recollida de leite e alimentos infantís nos supermecados do Porriño

O programa municipal de alimentos SOS Porriño, coa axuda dos supermercados do noso municipio, organiza este sábado unha campaña de recollida de leite e alimentos infantís. Trátase dos produtos máis demandados polos usuarios, e dos cales non existe reserva neste momento.

O alcalde do Porriño, Nelson Santos, e a concelleira de Benestar Social, Teresa Veloso, fan un chamamento á solidariedade dos porriñeses e coinciden en “convidar a todos os veciños a que axuden coa súa achega, dentro das posibilidades de cada un, ás familias que neste momento atravesan momentos difíciles”.

Así, o vindeiro sábado 11 de abril, de 10:00 a 14:00 horas, habilitaranse puntos de recollida nos diferentes supermercados locais, onde os interesados depositarán briks de leite, potitos para bebés, cereais ou leite en po.

SOS Porriño atende a máis de 300 familias do municipio usuarias dos Servizos Sociais

Desde os Servizos Sociais do Concello do Porriño e SOS Porriño trabállase a diario para dar resposta ás demandas das familias máis necesitadas, levando a cabo diferentes iniciativas co obxectivo de colleitar alimentos. Desde a súa creación no ano 2011, SOS Porriño atende ás familias usuarias dos Servizos Sociais. Os alimentos colleitados nas diferentes campañas, os achegados polo FEGA (Fondo Español de Garantía Agraria) a través de Cruz Vermella, así como as achegas de particulares e empresas, destínanse a axudar ás máis de 300 familias usuarias do programa municipal de alimentos, que acoden periodicamente a recoller un lote de víveres composto por alimentos non perecedoiros. En función da tipoloxía da familia engádense outros alimentos, así, se hai nenos engádense outros produtos como galletas, leite en po ou potitos para bebés.

Todos aqueles particulares ou empresas que desexen realizar unha doazón poden dirixirse aos Servizos Sociais do Concello do Porriño.