“Pan! Pan!” no Porriño para celebrar o Día Mundial do Teatro

O Círculo Recreativo Cultural do Porriño acolle este mércores, ás 20:00 horas, “PAN! PAN!”, o traballo co que a compañía teatral A Panadaría gañouse o favor da crítica, postulándose como espectáculo galego revelación deste ano. Esta compañía, integrada na súa totalidade por mulleres, trae ao Porriño o seu primeiro e exitoso traballo que conta xa cun importante recoñecemento, dous nomeamentos aos Premios María Casares que se celebrarán este mesmo xoves, unha delas para a porriñesa Areta Bolado, nomeada a Mellor Actriz Secundaria.

“PAN! PAN!” é unha parodia musical das películas de vaqueiros americanos que narra a historia de Harry, un cowboy que persegue a un indio que roubou á súa muller. Unha obra repleta de humor e música que conseguirá que riamos de todos os elementos das películas do Far West.

Dentro da promoción deste evento, organizado pola concellaría de Cultura do Concello do Porriño, a compañía está a levar a cabo unha orixinal campaña publicitaria a través de seis panadarías do noso municipio de modo que, cada persoa que compre unha barra de pan nestes locais recibirá unha bolsa coa información das próximas funcións da Panadaría.