Os tripulantes rescatados do ‘Guariste Primero’ son de Riveira e do Morrazo

Os tres tripulantes de nacionalidade española que foron rescatados en augas do Pacífico, tras o incendio no pesqueiro ‘Guariste Primero’ (con porto base en Vigo), son naturais do Morrazo e Riveira, segundo confirmaron fontes da armadora, Pesqueira Dacova.

Eses tres mariñeiros, xunto con outros dez tripulantes (4 caboverdianos e 6 indonesios), foron rescatados por outro barco galego, o palangreiro ‘Balueiro Segundo da Guarda’ (Pontevedra), despois de que se declarase un incendio a bordo.

Polo momento, descoñécese cando chegarán a porto os mariñeiros rescatados, que navegan a bordo do ‘Balueiro Segundo’, e que estaban a 840 millas ao sueste de Lima (Perú) cando se produciu o accidente.

Fontes da armadora explicaron que “é complicado” determinar se tomarán rumbo a terra proximamente, tendo en conta que o barco que lles rescatou “ten que “seguir faenando”. En calquera caso, confirmaron que a pesqueira “está a xestionar coa aseguradora” o seu regreso á casa.

ACCIDENTE

Ás 6,17 horas deste luns -hora española- a Secretaría Xeral de Pesca (Segepesca) contactó con Salvamento Marítimo para alertar sobre o incendio do pesqueiro vigués ‘Guariste Primero’ a 840 millas ao sueste de Lima.

Foron rescatados 13 dos seus tripulantes, mentres que outro deles, o xefe de máquinas, permanece desaparecido. O barco que lles rescatou, o ‘Balueiro Segundo’, atopábase a 14 millas da posición do pesqueiro incendiado.

A zona da emerxencia está asignada pola Organización Marítima Internacional a Chile, segundo concretou Salvamento Marítimo, que engadiu que, tal e como está establecido nos protocolos, o Centro de Coordinación Nacional Salvamento Marítimo recibiu a información sobre o accidente ao tratarse dun pesqueiro español.

SALVAVIDAS

O capitán do ‘Guariste Primero’ relatou que, tras producirse o incendio, o xefe de máquinas, con dobre nacionalidade peruana e española, quedou atrapado na sala de máquinas.

A tripulación intentou extinguir o incendio do pesqueiro sen éxito e, de inmediato, lanzaron as balsas salvavidas e 13 tripulantes subiron a bordo con equipación de seguridade, como radiobaliza, vhf portátiles e outro material.

Antes de abandonar o barco conseguiron contactar co pesqueiro español ‘Cervera’, tamén con porto base en Vigo, que estaba a 60 millas da súa posición e este deu a alerta aos buques españois que se achaban próximos ao lugar da emerxencia.

O máis próximo, o guardés ‘Balueiro Segundo, que estaba a 14 millas, foi o que se encargou do rescate dos 13 tripulantes do ‘Guariste Primero, que se achaban nas balsas salvavidas.