A Garda Civil investiga en Sada o incendio de varios vehículos estacionados

Un dos vehículos queimados

A Garda Civil investiga o incendio esta madrugada de varios vehículos estacionados no municipio de Sada (A Coruña), segundo informa a Casa do concello. No suceso, quedou calcinada unha ambulancia e un turismo parcialmente.

Ás 0,55 horas deste xoves, o Servizo de Emerxencias Municipal e Policía Local foron alertados do incendio de varios vehículos estacionados no lugar de Fiunchedo, na zona de estacionamento do cemiterio municipal.

Desprazados ao lugar, os efectivos do SEM observaron unha ambulancia e un turismo ardendo ao lado doutros vehículos polo que estes se retiraron “para evitar danos maiores”, precisa a Casa do concello.

O operativo continuou co despregamento de dúas liñas de mangueiras para sufocar as lapas dos vehículos afectados, colaborando os Bombeiros con outra liña de mangueira ata lograr a completa extinción do incendio.