Os servizos sociais de Riveira logran aprazar o desfiuzamento dunha familia que ía ter lugar no día de mañá

Os Servizos Sociais do Concello de Riveira lograron in extremis unha moratoria de dous meses no desaloxo dunha familia da nosa cidade como consecuencia dunha execución hipotecaria. Esta moratoria logrouse tras manter conversas a tres bandas, entre o Concello, os Xulgados e a entidade bancaria correspondente, que finalmente accedeu á suspensión temporal poñendo como condición que a familia obxecto do desaloxo siga as directrices establecidas polos Servizos Sociais.

Neste senso, os dous meses gañados servirán para que no marco dun programa de intervención familiar se acade o realoxo da familia afectada na que, dos seis membros integrantes, dous son menores de idade e son merecedores por tanto dunha especial protección.