O goberno porriñés destina 50.000 euros á mellora de catro camiños en Atios

O Concello do Porriño acometerá diferentes obras de acondicionamento, pavimentado e saneamento en catro viais da parroquia de Atios. As obras, cuxo importe ascende a preto de 50.000 euros, consisten en acondicionamento de tres camiños na Guía e Coveo, e dun vial na Rocha. “Respondendo como ata agora ás demandas dos veciños en materia de mellora dos camiños e pistas rurais de todas a parroquias do noso municipio, continuamos traballando no acondicionamento de todos estes viais secundarios que transcorren polas diferentes parroquias e que son utilizados a diario polos veciños”, apunta o alcalde do Porriño, Nelson Santos.

No lugar da Rocha, procederase á dotación de rede de saneamento dun camiño nun tramo de 60 metros, dando conexión á rede de servizo da zona. Tamén se executarán 4 pozos de rexistro e finalmente procederase ao pavimentado do vial.

Por outra parte, executaranse obras de mellora e pavimentado de tres camiños nos lugares da Guía e Coveo. Ademais da mellora na pavimentación, dotarase de rede de saneamento un tramo de 110 m dun destes viais, instalando tres pozos de rexistro e conectándoo á rede de servizo da zona. Así mesmo, dotarase ao vial de cunetas para a recollida de augas pluviais.