Comezan as obras de peche da pista deportiva do Ceip Fernández López

O alcalde do Porriño na visita ás obras do centro educativo

O alcalde do Porriño, Nelson Santos, acompañado do concelleiro de deportes, M. Alejandro Lorenzo, e a concelleira de Facenda e Xuventude, Iria Lorenzo, visitou esta mañá a pista deportiva do CEIP Fernández López onde xa comezaron a executarse as obras de peche da pista deportiva.

O Concello do Porriño acometerá con fondos propios esta reforma, cuxo presuposto supera os 36.000 euros, que permitirá, tanto aos escolares como outros deportistas, practicar deporte nas mellores condicións. E é que, debido á súa situación próxima ao Polideportivo Municipal, este recinto é frecuentado tamén por equipos da zona que, a partir de agora, poderán contar cunha nova pista para adestrar e practicar deporte.

“Dende o Concello facemos un grande esforzo en atender as demandas dos distintos centros educativos do Porriño”, manifesta o rexedor, “Dotar ao noso municipio das axeitadas infraestruturas educativas e deportivas, repercute nunha mellora da calidade de vida dos veciños, e sobre todo, nunha mellora das condicións dos escolares que cada día acoden a este centro, que contarán cunha pista renovada e acondicionada para divertirse e practicar deporte,”.