Os mariñeiros do ‘Paquito II’ desaparecidos en Corrubedo son de Boiro

Os mariñeiros do ‘Paquito II’ desaparecidos á altura de Corrubedo, no municipio coruñés de Ribeira, son naturais de Boiro, un de eles, o patrón do bateeiro que non foi atopado, é ademais exconcelleiro do PP.

Concretamente, permanecen desaparecidos o patrón, Germán Fernández Triñanes, de 52 anos, e os outros dous tripulantes, Santiago B.T. e Juan H.T., de 47 e 37 anos de idade.

O ‘Paquito II’ viaxaba este martes do porto base, en Cabo de Cruz (Boiro) cara a Muros, cando se perdeu contacto coa embarcación e saltou a alarma, sobre as 17,00 horas. Ás 14,00 horas producírase a última conexión e as alertas acendéronse ao non chegar o barco.

Segundo explicou o alcalde de Boiro, Juan José Dieste, na zona onde despareceu o barco había este martes mar de fondo, con ondas duns 3 ou 4 metros.

Polo momento, o dispositivo, activado por terra, mar e aire, atopou algúns efectos persoais e restos do barco, así como detectou unha mancha de gasóleo, pero pasadas as 22,00 horas do martes non se atopou o bateeiro.

LUGAR DE SEGUIMENTO

O dispositivo de busca séguese dende o faro de Corrubedo e, ata alí, ademais do alcalde de Boiro desprazouse o seu homólogo de Ribeira, Manuel Ruiz Rivas, e a conselleira do Mar, Rosa Quintana.

Así mesmo, decenas de persoas, entre coñecidos, achegados, veciños, compañeiros da empresa e propietarios da armadora achegáronse ata o punto para seguir os labores de busca.

Deste xeito, habilitouse a Casa do Mar de Corrubedo para que as persoas que se achegaron poidan pasar a noite e seguir o dispositivo, así como “tomar algo quente”. Tamén se porá a disposición dos familiares atención psicolóxica.