Familiares do acusado do dobre crime de Abadiño lémbrano como “boa persoa e campechano”
Familiares galegos do acusado do dobre crime de Abadiño (Biscaia), Benito Quintairos, natural de Cualedro (Ourense), defíneno como “home modelo, boa persoa e campechano”.
Así o manifestou este xoves, o alcalde de Cualedro, Luciano Rivero, tras falar con familiares do detido pola morte da súa esposa e a súa sogra en Euskadi.
O rexedor, que precisou que non coñece persoalmente ao detido polo dobre homicidio, lembrou que o home se foi con 16 anos ao País Vasco e “adoitaba acudir ao pobo en períodos vacacionais”, especialmente no verán.
Familiares e veciños descríbeno como “un home moi conversador” ao que lle encantaba xogar ao fútbol e estar cos amigos”, segundo precisou o alcalde, que engadiu que están todos “consternados” e non se mentalizan de que puidese facer iso”.
O arrestado polo dobre crime, natural da parroquia de Atás, en Cualedro, ten unha tía na localidade e curmáns no municipio próximo de Verín (Ourense).
MINUTOS DE SILENCIO
Pola súa banda, o alcalde de Cualedro, de onde é natural o acusado, condena o sucedido e expresa a súa “repulsa a todo tipo de violencia de xénero”.
Por iso, este xoves ás 12,00 horas realizarán unha parada para gardar cinco minutos de silencio fronte á Casa Consistorial para condenar o crime.
Ademais, o Concello ten previsto no próximo pleno ordinario, en xaneiro, aprobar un acordo “de repulsa a todo tipo de violencia de xénero”, segundo concluíu o rexedor, que espera que a súa localidade non volva ser noticia por un tema deste tipo.