O Concello do Porriño inviste máis de 60.000 euros na mellora de cinco camiños en Budiño

Respondendo como ata agora ás demandas dos veciños en materia de mellora dos camiños e pistas rurais de todas as parroquias do noso municipio, o Concello do Porriño acometerá diferentes obras de acondicionamento, pavimentado e saneamento en cinco viarios da parroquia de Budiño.

As obras, cuxo importe supera os 60.000 euros, consisten na dotación de rede de saneamento de dous camiños no barrio de Casal e outros dous no barrio de Mosteiro; e o asfaltado dun tramo dun viario en Vaquería.

“Atendendo ás demandas dos veciños en materia de infraestruturas, desde o Concello seguimos traballando na mellora e acondicionamento de todos estes viarios secundarios que transcorren polas diferentes parroquias e que a diario utilizan os veciños”, apunta o alcalde do Porriño, Nelson Santos.

No barrio de Vaquería, procederase ao asfaltado dun tramo dun camiño “Dado o mal estado en que se atopa este viario procederase a pavimentar e asfaltar o tramo afectado”, comenta o rexedor, “tamén se dotará ao camiño dun tramo de cuneta para a recollida de augas pluviais e a posta en rasante das tapas de pozos de rexistro existentes”.

Por outra banda, executaranse as obras de dotación de rede de saneamento en catro camiños de Casal e Mosteiro. No primeiro caso, conectaranse dous tramos de 90 m e 182 m de lonxitude de rede de saneamento ás redes de servizo da zona. No primeiro tramo executaranse 4 pozos de rexistro e 6 acometidas, e no segundo 8 pozos de rexistro e 10 acometidas. No barrio de Mosteiro, executaranse dous tramos de rede de saneamento, un tramo de 140 m de lonxitude e outro de 190 m, que se conectarán tamén a senllas redes de servizo da zona. Executaranse tamén 3 pozos de rexistro en cada un deles.

En todos os casos, finalmente procederase ao correcto pavimentado do viario.