Máis de 80 xóvenes de Pazos de Borbén participan nun ciclo de cine con motivo do Día internacional contra a Violencia de Xénero

Proxección en Pazos de Borbén

O Concello de Pazos de Borbén comezou esta mañá co seu ciclo de actividades orientadas a combater a violencia de xénero dentro do ámbito da educación. Nesta ocasión os alumnos de secundaria do CPI Curros Enríquez asistiron á proxección da película “As mulleres de verdade teñen curvas”, co obxectivo de estudar e mostrar o rexeitamento aos roles de submisión da muller instalados na sociedade. Estas accións forman parte do programa de sensibilización que a concellaría de educación do Concello de Pazos de Borbén leva a cabo ao longo do ano, co obxectivo de fomentar valores como a igualdade, a tolerancia, a empatía, o respecto ao próximo e a necesidade de compartir e de axudar aos demais.

Trátase dunha simpática comedia dramática sobre unha adolescente que se esquece da súa talla e enfróntase á súa nai polo soño dun paseo por Nova York con sabor a independencia e emancipación.A película céntrase en destacar as posibilidades que ofrece á sociedade a construción dunha nova xenealoxía de heroínas cotiás que rompen con esa violencia simbólica que adscribe ás mulleres a roles de submisión. Unha proposta cinematográfica convertida xa nun moderno clásico cinematográfico que permite desmontar o réxime de representación patriarcal.

A campaña de sensibilización e concienciación sobre a violencia de xénero nos centros educativos continuará proximamente traballando cos alumnos de primaria do concello. En próximas sesións os pequenos asistirán a sesións de contacontos e talleres nos que a igualdade entre homes e mulleres será o tema principal. Así mesmo, os educadores do CPI Curros Enríquez continuarán con este labor nas aulas dialogando cos mozos sobre as súas experiencias respecto diso e o seu compromiso coa erradicación da violencia sexista.